Experimento: cal cae máis rápido?

Este experimento é moi doado de facer.
Só precisamos distintos obxectos, que teñan pesos e formas diferentes.
Nós usamos:

• Un folio engurrado. 
• Unha goma de borrar. 
• Unha pluma de ave. 
• Un folio posto de xeito horizontal. 

Primeiro, fixemos as nosas predicións acerca de cal caerá máis rápido.

Logo, lanzamos os obxectos ao mesmo tempo desde a mesma altura, poñendo o folio de xeito horizontal.
O obxecto que máis tardou en caer  foi a pluma, e iso fíxonos pensar que o peso é moi importante en relación coa velocidade coa que caen os obxectos.
Pero daquela...por que o folio engurrado cae máis rápido que o folio posto horizontal, se os dous pesan o mesmo?
A resposta está no aire (case como na canción de Bob Dylan).
Como non vemos o aire, tendemos a esquecer que está aí, pero as partículas dos gases que o compoñen sosteñen con máis facilidade un folio estirado que un engurrado.
Por iso, se fixésemos o experimento no vacío, unha pluma e un obxecto moi pesado caerían ao mesmo tempo, tal como no seu día demostrou Galileo. Mira, mira!

Experimento: taumatropo.

Que pasa cando vemos dúas imaxes moi rapidamente, unha a continuación de outra?
Pois que se superpoñen no noso cerebro, e vémolas unidas.
Esa é a base dos debuxos animados, e tamén a deste xoguete que acabamos de facer, o taumatropo.

Para facelo, pintamos e recortamos dous círculos que levan imaxes combinables (un paxaro e unha póla, un peixe e o mar, unha araña e unha arañeira, unha cabeza e un sombreiro...), pegámolos sobre un cartón para darlle un pouco de consistencia, e despois metemos un pauiño polo medio, para poder xiralas.
Ao xirar, as imaxes superpóñense, e vemos o paxaro subido na póla, o peixe sobre o mar, a araña na súa arañeira, o sombreiro enriba da cabeza...
Veña, a xirar o voso taumatropo, e...que xire o mundo!

Experimento: o equilibrista.

O noso último experimento vai de equilibrios.
Con tres tapóns de corcho, dous espetos de madeira, dous alfinetes e unha bóla de polispán,construímos unha figura, e poñémola a andar por unha pasarela feita cunha regra  suxeita entre dous libros. Bueno, e noutros sitios: o dedo, a punta do nariz, o borde da mesa...

Despois, miramos que pasaba cando lle quitamos un dos corchos, e tamén que pasa cando lle quitamos os dous.
Así chegamos á conclusión de que ter o mesmo peso en cada lado axúdalle a conservar o equilibrio. 
O experimento gustounos moito. Animádevos a probar!
Que teñades un día moi equilibrado. ;-)

Un experimento moi noxento.

Que pasa cos alimentos cando os deixamos ao aire, sen ningún tipo de protección?
Como non o tiñamos moi claro, decidimos facer a proba.
Collemos:

• Un anaco de queixo. 
• Un iogur. 
• Un anaco de pan.
• Un anaco de mazá. 
• Garavanzos crus. 
• Un anaco de tomate.

Primeiro fixemos as nosas hipóteses sobre o que pensábamos que ocorrería con cada un deses alimentos. Poñeríase negro? Máis brando? Máis duro? Collería mofo?
Para comprobalo, deixamos cada cousa no seu recipiente, a temperatura ambiente, durante varios días. Ao longo dese tempo, fomos facendo distintos rexistros do que observábamos.
Aos pocos días (puaj!!!) houbo que tirar o anaco de tomate: ademais de ter mofo, cheiraba e botou un líquido noxento...iso non podía seguir ao noso lado!
Pouco a pouco tivemos que ir tirando todo, porque se poñía realmente noxento. Todo menos unha cousa: os garavanzos.
Preguntámonos por que sería iso, e levamos a pregunta para casa. Alí dixéronnos que era porque estaban secos.
Así que agora xa sabemos que un método para conservar os alimentos por máis tempo é secalos. É o que se fai, ademais de cos garavanzos, coas fabas, coas lentellas, coas froitas "pasas"...
Que outras maneiras haberá para conservar os alimentos?
Seguimos investigando, xa vos contaremos!

Plano inclinado 2.

En 2º A seguimos experimentando cos planos inclinados.
Este segundo experimento consiste en variar a inclinación do plano, e ver que efecto ten esa variación na velocidade do obxecto lanzado por el abaixo, e na distancia percorrida por ese obxecto.

Primeiro fixemos as nosas hipóteses: que pasará se aumento a inclinación do plano? Irá o obxecto máis rápido ou máis lento? A que distancia chegará?
Despois, fixemos as nosas comprobacións, a base de observación e cinta métrica.
Observamos que canto máis alta é a plataforma de apoio, máis velocidade colle o obxecto, e máis lonxe chega.

Experimento con rampas

Que lle pasa a un obxecto cando o tiramos por un plano inclinado?
Que obxectos se deslizarán mellor por el? Cales chegarán máis lonxe?  A que distancia chegará cada un?
Fixémonos todas estas preguntas, e tratamos de aventurar a nosa resposta antes de comprobalo, escribindo as nosas predicións na folla de rexistro.  É dicir: fixemos hipóteses. Así funciona o método científico!

Despois, montamos o plano inclinado no pasillo, e comprobamos as nosas predicións. Vimos que hai obxectos que se deslizan moi ben e que chegan moi lonxe, mentres que outros deslízanse con dificultade ou mesmo quedan parados.
A conclusión á que chegamos é que os obxectos que teñen forma redondeada deslízanse moito mellor.
Xa o pensábamos...pero agora sabémolo de certo!

Barco impulsado a xabón

Seguindo cos experimentos sobre a tensión superficial, fixemos este de barco propulsado a xabón. 
É moi sinxelo de facer, así que podedes probar na casa.
Hai que cortar un anaco de papel ou foam, con forma de bote.
Bota auga nun recipiente un pouco grande, e deixa que a auga se calme.

Primeiro, bota o barco na auga sen máis, verás que non se move ou que o fai moi amodiño.
Agora bótalle xabón na popa, e volve a poñelo na auga. Ves que pasou? Corre un montón!
O xabón rompe a tensión superficial da auga, e fai que o barco se desprace a toda mecha.
Se queres repetilo, tes que librar a auga e limpar ben os restos de xabón, para que volva a funcionar.

Reto: fai un "sistema respiratorio"

https://youtu.be/dVDaqtgE6EU

Reto: apetécesevos ver este vídeo é facer  un aparato respiratorio?
No faladoiro veremos as vosas  construcións!

Ovo en vinagre

Que sucede se metemos un ovo en vinagre durante uns días?
Como non sabíamos a resposta, fixemos a proba.
Collemos un recipiente, o ovo que quedou do anterior experimento (si que nos rendeu!), e vinagre, e a probar, que a ciencia é probar e observar.

Fixemos as nosas hipóteses (poñerase marrón? poñerase engurrado? escachará?...), e fomos observando os cambios día a día.
Hoxe tocaba mirar o resultado.
O primeiro que observamos é que...cheiraba un montón!
Despois, quitamos o vinagre e puidemos ver que o ovo estaba translúcido e brando.E rebotaba!
Bueno, iso no primeiro intento. No segundo...escachou!
Ao escachar, observamos que aínda que perdeu a casca, tiña unha pel branda que o recubría.
Parece que o vinagre desgasta algúns materiais...
A semana que vén probaremos cun óso!

Experimento sobre densidade

 Dentro da proposta de traballo que vimos de rematar en 2ºA, unha das actividades de Ciencias foi o experimento do ovo flotante. 
Consiste en poñer un ovo en tres vasos dos que un só ten auga, outro auga con dúas culleradas de sal, e outro auga con cinco culleradas de sal.
Fixémolo e observamos que pasaba en cada caso.

Pincha na imaxe para ver máis fotos do experimento

Despois, recollíamos os resultados na folla de rexistro, indicando se o ovo flotaba, ía para o fondo ou quedaba a medias.
Teño que subliñar que o ovo sobrevivíu a dúas semanas de manipulacións por parte de todo o grupo... Merecemos un aplauso, non? :-)